Paco Llorente

Paco Llorente

Biografía
Nacemento	(es) Francisco Llorente Gento 21 de maio de 1965 (59 anos) Valladolid, España
Altura	180 cm
Peso	72 kg
Actividade
Ocupación	futbolista
Período de actividade	1986 - 1998
Nacionalidade deportiva	España
Deporte	fútbol
Posición de xogo	Extremo esquerdo
Traxectoria   Equipo 1985–1986   Atlético de Madrid 31 (5) 1985–1986   Atlético de Madrid B 31 (5) 1986–1987   Atlético de Madrid 29 (3) 1987–1994   Real Madrid CF 105 (8) 1994–1998   SD Compostela 72 (2)   Selección nacional 1986–1986   España sub-21 5 (0) 1986–1987   España sub-23 3 (0) 1987–1987   España 1 (1)
Familia
Fillos	Marcos Llorente
Irmáns	José Luis Llorente Julio Llorente Toñín Llorente

Francisco Llorente Gento, nado en Valladolid o 21 de maio de 1965, máis coñecido como Paco Llorente, é un exfutbolista español.

Traxectoria

Procedente dunha familia de recoñecidos deportistas, é sobriño de Paco Gento, Julio e Antonio Gento, xenro de Ramón Grosso, pai de Marcos Llorente e irmán do tamén futbolista Julio, así como dos xogadores de baloncesto José Luis e Toñín. Criouse en Madrid e comezou a xogar nas categorías inferiores do Real Madrid para pasar en 1982 a xogar co Urbis de Moratalaz e ao ano seguinte no CD Móstoles. Alí foi descuberto polos observadores do Atlético de Madrid, que o levaron para o filial deste, o Atlético Madrileño, entón na Segunda División. Na tempada 1985/86 xogou 30 partidos como titular co seu novo club. Co Atlético de Madrid debutou en Primeira División o 6 de abril de 1986 contra a UD Las Palmas, substituíndo a Luis Mario Cabrera. A tempada 1986/87 foi a da súa consagración no Atlético de Madrid, e ao rematar a tempada fichou polo Real Madrid, converténdose no primeiro xogador que se acolleu ao Real decreto 1006 que permitía a rescisión unilateral dos contratos dos deportistas de elite.

O Real Madrid vivía a época áurea da Quinta del Buitre, case intratable na Liga, e Llorente non logrou converterse en titular nunha dianteira na que Butragueño e mais Hugo Sánchez eran inamovibles. Así e todo, tivo un dos momentos máis recoñecidos da súa carreira no enfrontamento do Real Madrid na Copa de Europa 1987/88 contra o FC Porto, o vixente campión de Europa. Ao rematar a primeira parte o 1 a 0 daba a vitoria os portugueses mais Llorente saíu na segunda parte e deu dous balóns de gol a Míchel, que lle deu a volta ao marcador.

Nos anos seguintes, Llorente foi un dos suplentes máis valorados do cadro, e entre outros partidos salienta o que xogou como titular contra o PSV Eindhoven na volta dos cuartos de final da Copa de Campións de Europa o 15 de marzo de 1989 e na que o Real Madrid volveu eliminar un campión de Europa, aínda que non logrou o título. A saída do adestrador Leo Beenhakker e a chegada de John Benjamin Toshack supuxo o comezo do seu declive no equipo, aínda que permaneceu no conxunto ata 1994.

Logo xogou catro tempadas na SD Compostela ata a usa retirada en 1998.

Selección nacional

Xogou nos anos 1986 e 1987 coas seleccións de fútbol sub 21 e sub 23. Coa selección absoluta xogou un único partido, foi un encontro de clasificación para a Eurocopa de Alemaña 1988 contra Albania, no que Llorente anotou un dos cinco goles de España.